“სტერილური “პოლიტკორექტულობაა” სწორედ ის უკიდურესობა, რომელიც ბუნებრივად და კანონზომიერად შობს საწინააღმდეგო უკიდურესობას ფაშისტური მემარჯვენეობის სახით” – ნიკა გვარამია

ოპოზიციის ალიანსისა და “კოალიცია ცვლილებებისთვის” ერთ-ერთი ლიდერი, ნიკა გვარამია, სოციალურ ქსელში მის მიერ გამოყენებულ კონკრეტულ ტერმინთან დაკავშირებით გაკეთებულ მძიმე შეფასებებს, ერთგვარი შედარებითი განმარტებებით ეხმაურება:

“ვეხმაურები ტელეკომპანია იმედის ამორალურ პროვოკაციას, ჩემს მიერ ერთერთ პოსტში მოხსენიებულ ტერმინ “პოლიტიკურ აუტიზმთან” დაკავშირებით:

ცხადია, არავითარ კავშირში აუტისტური სპექტრის მქონე ადამიანების სტიგმატიზებასთან ამ შემთხვევას არ აქვს. ამიტომაცაა მიწერილი ზედსართავი “პოლიტიკური” და თავად ტერმინი ჩასმულია ბრჭყალებში.

ის, რომ აუტიზმი დიაგნოზია, არანაირად არ განაპირობებს რეალური ადამიანების შეურაცხყოფას. “პოლიტიკურად კოჭლი” რომ მეწეროს, ან “პოლიტიკური სიყრუე”, ან “პოლიტიკური შიზოფრენია”, მაშინ? თუ სიყრუე, სიბრმავე და შიზოფრენია დიაგნოზი არაა?

სტერილური “პოლიტკორექტულობაა” სწორედ ის უკიდურესობა, რომელიც ბუნებრივად და კანონზომიერად შობს საწინააღმდეგო უკიდურესობას ფაშისტური მემარჯვენეობის სახით.

ps რაკიღა ცალკეულმა ადამიანებმა აღიქვეს ეს გამოთქმა პრობლემად, დავას არ ვაპირებ, უბრალოდ წავშლი პოსტის იმ ნაწილს“, – წერს ნიკა გვარამია სოციალურ ქსელში.