შერიგებისა და სამოქალაქო თანასწორობის საკითხებში სახელმწიფო მინისტრი ქეთევან ციხელაშვილი ავსტრიაში საქართველოს ელჩად ინიშნება. სახელმწიფო მინისტრი აღნიშნავს, რომ ავსტრიაში საქართველოს ელჩად დანიშვნა საპატიო, საპასუხისმგებლო და კომპლექსური მანდატია და სადაც არ უნდა იმყოფებოდეს ყველგან დაიცავს სახელმწიფოსა და ხალხის ინტერესებს:
“15 ივნისიდან ნამდვილად არის მიღებული გადაწყვეტილება, რომ მე გავაგრძელო საქმიანობა როგორც საქართველოს მუდმივმა წარმომადგენელმა ეუთოს მისიაში, ასევე ვენაში განლაგებულ საერთაშორისო ორგანიზაციებში და საქართველოს ელჩად ავსტრიის რესპუბლიკაში, რომელიც არის ძალიან საპატიო, ძალიან საპასუხისმგებლო და ძალიან კომპლექსური მანდატი.
თუმცა, 15 ივნისამდე მე ვაგრძელებ ჩემს საქმიანობას როგორც სახელმწიფო მინისტრი, ახლაც ვიმყოფები ოძისში და ვაპირებთ ძალიან აქტიური კამპანიის ჩატარებას გამყოფი ხაზების სრულ პერიმეტრზე, რომ დავეხმაროთ ჩვენს მოსახლეობას ჰუმანიტარული სხვადასხვა პაკეტით და არა მხოლოდ, განსაკუთრებით მაშინ, როდესაც კოვიდ 19-ის ფონზე არ წყდება რუსეთის საოკუპაციო რეჟიმის მხრიდან ბორდერიზაცია. მე ახლაც ყოველდღე მთელი ენერგიით და მომავალშიც ყველგან, სადაც არ უნდა ვიყო დავიცავ ჩემი სამშობლოს, ჩემი სახელმწიფოს და ჩემი ხალხის ინტერესებს,” – აცხადებს ქეთევან ციხელაშვილი.
ავტორი
თამთა ასლანიშვილი
