„ახალი საქართველოს“ თავმჯდომარე გიორგი ვაშაძე აცხადებს, რომ გიორგი რურუას გათავისუფლება არის პრინციპული საკითხი და აუცილებლობა, რომ ოპოზიციამ საარჩევნო ცვლილებებს მხარი დაუჭიროს. ასევე აღნიშნავს, რომ თბილისში მაჟორიტარობას აპირებს, მაჟორიტარულ ოლქებთან დაკავშირებით პარტიები მალე მიიღებენ გადაწყვეტილებას. ოპოზიციონერი ლიდერს მიაჩნია, რომ ოქტომბერში ახალი კოალიციური მმართველობა ჩამოყალიბდება, რომელიც ქართულ დემოკრატიას სჭირდება.
„ოპოზიცია საერთო გეგმით მოქმედებას აგრძელებს. ნოემბრის შემდეგ საერთო სტრატეგია გვაქვს და ამ სტატეგიის ახალ ფაზაზე გადავდივართ.
დღეს გავრცელდება ერთობლივი განცხადება და კიდევ ერთხელ მკაფიოდ ნახავთ ჩვენს პოზიციას, რომ აუცილებელია გიორგი რურუას გათავისუფლება, რათა საარჩევნო ცვლილებებზე ოპოზიციის თანხმობა მოხდეს და ჩვენ ამ საკითხს პრინციპულად ვაყენებთ და დარწმუნებული ვარ ესეც იქნება.
ჩვენ შევაფასეთ ყველა გარემოება და აბსოლუტურად ღიად უნდა ვთქვათ, რომ „ქართულმა ოცნებამ“ სრულად დაკარგა დასავლეთის მხარდაჭერა და ფაქტობრივად, ეს არის მნიშვნელოვანი გარემოება, რომელიც ხელს შეუწყობს ქვეყანაში, ოქტომბერში, ახალი კოალიციური მმართველობის ჩამოყალიბებას, რაც ქართულ დემოკრატიას სჭირდება.
რაც შეეხება მაჟორიტარულ ოლქებს, ამაზე გვქონდა ზოგადი საუბარი, არა კონკრეტული და ალბათ, ერთი-ორი კვირის ვადაში ყველა პარტია უკვე ჩამოყალიბდება, მონაწილეობს თუ არა მაჟორიტარების შეთანხმებაში. მე პირადად ვმონაწილეობ და ვაპირებ მაჟორიტარობას, სავარაუდოდ თბილისში.
პროპორციულ ნაწილში ცალ-ცალკე ვიქნებით, „ახალი საქართველოს“ გუნდი გაერთანებული ოპოზიცია “ძალა ერთობაშიას” ფორმატში იქნება, სადაც არის „ნაციონალური მოძრაობა“ და სხვა პარტიები.
გულწრფელად მინდა ვუთხრა მადლობა ჩვენს მხარდამჭერებს, რომ ჩვენი პარტიის – „ახალი საქართველოს“ რეიტინგი ასე სწრაფად იზრდება. დიდი მხარდაჭერა გვაქვს, რაც ძალიან კარგია, მაგრამ ვფიქრობთ, რომ გაერთიანებული ოპოზიცია არის ის ძალა, რომლის გარშემოც ჩამოყალიბდება ახალი კოალიციური მმართველობა ქვეყანაში,“ – აცხადებს გიორგი ვაშაძე.
ავტორი
თამთა ასლანიშვილი
