“სამოქალაქო მოძრაობის” ლიდერი ალექსანდრე ელისაშვილი აშშ-ის სენატის საგარეო ურთიერთობათა კომიტეტის თავმჯდომარის ჯეიმს რიშის მიერ “ტვიტერის” გვერდზე დაფიქსირებული პოზიციისა და პრეზიდენტის მიერ გიგი უგულავას და ირაკლი ოქრუაშვილის შეწყალების შემდეგ, პრემიერ-მინისტრ გიორგი გახარიას და იუსტიციის მინისტრ თეა წულუკიანს ახსენებს მათი მხრიდან რამდენიმე დღის წინ დაფიქსირებულ პოზიციებს:
“გახარია და წულუკიანი რომ ბაქიბუქობდნენ: წერტილიო, იწილო ბიწილოო, როგორ არიან ეხლა? თუ შნო არა გაქვთ რატო ატყდებით ხოლმე სამგლე გოჭებივით?” – წერს ფეისბუქის პირად გვერდზე ალექსანდრე ელისაშვილი.
შეგახსენებთ, რომ რამდენიმე დღის წინ გიორგი გახარიამ განაცხადა, რომ “საქართველოში პოლიტპატიმრები არ არსებობენ და არც პოლიტიკური მართლმსაჯულება არსებობს“, ხოლო იუსტიციის მინისტრი აღნიშნავდა, რომ “მოლაპარაკებების შედეგად გამოიცა წერილობითი დოკუმენტი, სადაც არავითარ პატიმართა გათავისუფლებაზე საუბარი ასევე არ არის“.
თავის მხრივ კი აშშ-ის სენატის საგარეო ურთიერთობათა კომიტეტის თავმჯდომარე ჯეიმს რიში აცხადებდა, რომ “მე ველოდები საქართველოს პოლიტიკური პარტიებისგან მარტის შეთანხმების სრულად შესრულებას ველოდები, პოლიტიკური პატიმრების გათავისუფლების და ახალი საარჩევნო სისტემისკენ წინსვლის ჩათვლით“.
