რუსეთთან დაკავშირებით, კერძოდ ოკუპაციის, ოთხოზორია-ტატუნაშვილის სიასთან და სხვა საკითხებთან დაკავშირებით “ევროპული საქართველოს” მიერ წარდგენილ ინიციატივას, რომელსაც მხარი “ნაციონალურმა მოძრაობამაც” დაუჭირა, ეხმიანება პარტია “ქართული ოცნება” და სპეციალურ ბრიფინგზე პარლამენტის ვიცე-სპიკერმა, გიორგი ვოლსკიმ გააჟღერა მმართველი პარტიის პოზიცია აღნიშნულ ინიციატივასთან მიმართებაში:
“7 წელია “ქართული ოცნება” წინა ხელისუფლების მავნე პოლიტიკით გამოწვეული კატასტროფული შედეგების ლიკვიდაციითაა დაკავებული. ერთ დროს “ერთიანი ნაციონალური მოძრაობის” სხვადასხვა განშტოების მხრიდან, იგულისხმება “ევროპული საქართველოც”, დღემდე არ წყდება ქვეყნისა და ხალხისათვის ზიანის მომტანი, უკიდურესად სარისკო აქტივობების ინიცირება.
მათი მიზანია გადაფარონ დანაშაულებრივი შეცდომები, ხოლო ოკუპაციის ფასი გადაიხადოს არა რუსეთმა, არამედ ქართველმა ხალხმა, გადაიხადოს საქართველომ. ხელისუფლებაში ყოფნის დროს მა, არაერთხელ, უკვე მოახერხეს და დაატეხეს ქვეყანას – ჯერ ეკონომიკური სანქციები, შემდეგ კი რუსეთის ჯარს შემოუძღვნენ საქართველოში.
სხვა ახსნა არ სეიძლება ჰქონდეს ინიციატივას, რომელიც ფორმით, თითქოს რუსეთისთვის პრობლემების შექმნას გულისხმობს და რეალურად რუსეთის მხრიდან საქართველოსათვის მძიმე ეკონომიკური სანქციების გარანტირებულად დაწესებისათვის არის გამიზნული“, – ნათქვამია “ქართული ოცნების” განცხადებაში.
შეგახსენებთ, რომ ოპოზიციამ პარლამენტში სამპუნქტიანი ინიციატივა წარადგინა, რასაც მმართველი პარტია მხარს არ უჭერს:
- საქართველოს ოკუპირებული ტერიტორიებიდან საოკუპაციო ძალების გაყვანა და 2008 წლის ევროკავშირის შუამდგომლობით მიღწეული ცეცხლის შეწყვეტის შესახებ ხელშეკრულების შესრულების მოთხოვნა შევიდეს ევროკავშირისა და აშშ-ს მიერ რუსეთის ფედერაციაზე დაკისრებული სხვადასხვა სანქციების მოთხოვნებში;
- ევროპის კავშირის და აშშ-ს მიერ რუსეთის ფედერაციაზე დაწესებული შესაბამისი პერსონალური სანქციების პაკეტებში ასევე შევიდეს ოთხოზორია-ტატუნაშვილის სია;
- ევროპის კავშირმა და აშშ-მ შემოიღონ სანქციები ყველა კომპანიის მიმართ, რომლებიც ეკონომიკურ საქმიანობას, მაგალითად, ეთნიკური წმენდის მსხვერპლთა ქონების გაქირავებას, წარმართავენ საქართველოს ოკუპირებულ ტერიტორიებზე.