49 წლის ასაკში გულის შეტევით გარდაიცვალა ცნობილი ქართველი პოლიტიკოსი, პროფესორი ნოდარ ხადური.
2012-2016 წლებში ნოდარ ხადური იკავებდა საქართველოს ფინანსთა მინისტრის თანამდებობას. შემდგომ კი სათავეში ჩაუდგა საქართველოს კონკურენციის სააგენტოს.
ნოდარ ხადური 1997-1998 წლებში იყო საქართველოს ფინანსთა მინისტრის მრჩეველი, აპარატის უფროსი, შიდა ქართლის სამხარეო-საფინანსო ადმინისტრაციის უფროსი; 1999 წლიდან ლექტორი თბილისის სახელმწიფო უნივერსიტეტში;
1999-2000 წლებში იკავებდა საქართველოს ეკონომიკის მინისტრის აპარატის უფროსის თანამდებობას;
2003-2004 წლებში საქართველოს პარლამენტის გადასახადებისა და შემოსავლების კომიტეტის აპარატის უფროსის, საქართველოს ფინანსთა მინისტრის მოადგილისა და საპარლამენტო მდივნის თანამდებობებს.
ნოდარ ხადური იყო 100-ზე მეტი სამეცნიერო ნაშრომის ავტორი, რომლებიც აშშ-ში, შვედეთში, უნგრეთში, ბულგარეთში, რუსეთის ფედერაციასა და აზერბაიჯანშია გამოქვეყნებული.
UPD (17:50): პუბლიკაციას ვამატებთ და უცვლელად ვაქვეყნებთ კონკურენციის სააგენტოს თანამშრომლების გამოსათხოვარ წერილს:
“სრულიად შეგვძრა საქართველოს კონკურენციის სააგენტოს თავმჯდომარის, პროფესორ ნოდარ ხადურის მოულოდნელმა გარდაცვალებამ.
იგი იყო საქვეყნოდ ცნობილი ეკონომისტი, პრინციპული და სამართლიანი ხელმძღვანელი, ინტელექტუალი, ერთგული და უშუალო პიროვნება, რომლის იმედი და გვერდში დგომაც ყოველთვის იგრძნობოდა მასთან ურთიერთობისას.
კონკურენციის სააგენტოს თანამშრომლებისადმი მისი ბოლო სიტყვები იყო: „ყველაფერი წინ არის!“
სამწუხაროდ, ბატონ ნოდარს ბევრი გეგმა და იდეა დარჩა განუხორციელებელი, რაც დიდი დანაკლისია როგორც კონკურენციის სააგენტოს, ისე სრულიად საქართველოსათვის. მისი ცოდნა და გამოცდილება კიდევ დიდხანს გაყვება მის თანამშრომლებს, სტუდენტებსა და კოლეგებს.
განუზომელი მწუხარებით, გულწრფელად თანავუგრძნობთ ოჯახს, მეგობრებს, კოლეგებს და ყველას, ვინც ამ არაჩვეულებრივ ადამიანს იცნობდა.
მშვიდობით ბატონო ნოდარ და მადლობა ყველაფრისათვის!
პანაშვიდი: 12 -13 სექტემბერი, თბილისი, სიონის საკათედრო ტაძარი
გამოსვენება: 14 სექტემბერი, 14:00 საათი, სიონის საკათედრო ტაძარი”