მეც ვგრძნობ ჩემს პასუხისმგებლობას შექმნილ პრობლემაზე – ნათია თურნავა

პარლამენტის დარგობრივი ეკონომიკისა და ეკონომიკური პოლიტიკის კომიტეტზე ეკონომიკისა და მდგრადი განვითარების მინისტრს, ნათია თურნავას მოუსმინეს. შეხვედრა საკმაოდ მწვავე დებატებისა და დაპირისპირების ფონზე მიმდინარეობდა. დეპუტატების არაერთი ხისტი პოზიციისა და უმწვავესი შეკითხვების მოსმენა უწევდა მინისტრს. ერთ-ერთი მნიშვნელოვანი თემა იყო პანკისის ხეობაში ჰესის მშენებლობასთან დაკავშირებით მომხდარი დაპირისპირება მოსახლეობასა და სამართალდამცავებს შორის. აღნიშნულთან დაკავშირებით მინისტრი სახელმწიფოსა და პირადად მის პასუხისმგებლობასაც ხედავს.

“ის რაც მოხდა, რასაკვირველია, იყო ძალიან სამწუხარო გაუგებრობა. და როდესაც მსგავსი ფაქტი ხდება, რა თქმა უნდა, ძირითადი პასუხისმგებლობა არის სახელმწიფოსი და რა თქმა უნდა, ეკონომიკის სამინისტროსი და ეკონომიკის მინისტრისაც. მეც ვგრძნობ ჩემს პასუხისმგებლობას, ამ შექმნილ პრობლემაზე და არა მარტო. მე ამასთან დაკავშირებით დავინახე ძალიან, ასე ვთქვათ, დიდი გამოწვევა და საჭიროება, მთლიანად ენერგეტიკის დარგის რეფორმირების. ანუ პანკისის და სხვა რამოდენიმე მსგავსმა შემთხვევამ, როდესაც ძალიან საჭირო ქვეყნისთვის პროექტები, ცუდი კომუნიკაციის გამო ბრკოლდება და ვერ ხორციელდება დროულად, ამან დაგვანახა, რომ ჩვენი ენერგეტიკის სექტორი საჭიროებს სწრაფ რეფორმირებას, მათ შორის, კომუნიკაციის ნაწილშიც. უკეთესი კომუნიკაცია, რომელიც აშკარად აკლდა ამ კონკრეტულ შემთხვევას” – განაცხადა ნათია თურნავამ.

მნიშვნელოვანი იყო ანალიკიის პორტის მშენებლობის საკითხის განხილვაც.

“სახელმწიფო და ეკონომიკის სამინისტრო არასოდეს მიიღებს რაიმე გადაწყვეტილებას, რომელიც ანაკლიის პორტისთვის დამაზიანებელი იქნება” – განაცხადა მინისტრმა.

კომიტეტის სხდომაზე მრავლად იყო უხერხული შეკითხვა-პრეტენზიები:

“ადევნებდა თუ არა თვალყურს ჭიათურაში მიმდინარე მოვლენებს ტელევიზიით?” – გიგა ბოკერია;

“რემენა” იცით ვინ არის, ქალბატონო ნათია? “რემენა” გაგიგიათ ესეთი ვინმე? – გიგა ბოკერია;

“რატომ ყიდის რუსულ გაზს აუქციონზე საქართველო და რა დატვირთვა აქვს მას. რატომ შემოვიყვანეთ “გაზპრომი”, როგორც სომხეთისთვის ტრანზიტად მიმწოდებლის ნაცვლად საქართველოს, ასე ვთქვათ, ჯანსაღ ეკონომიკაში, როგორც მეტასტაზი, როგორც კომერციული სუბიექტი?” – რომან გოცირიძე;

“21-ე საუკუნეში კვებაზე არ უნდა ვლაპარაკობდეთ. ადამიანები ითხოვდნენ, რომ სადაც ზიან იქ რომ ეს ურიგდებათ, პაკეტები – დღიური რაციონი ლარი და ოთხმოციანი, რომ იმის მაგიდა მაინც მოაწყონ და ძაღლებივით ფეხზემდგომელებმა არ ჭამონ. ეს საკითხი მაინც თუ დააყენეთ და შეათანხმეთ, რომ მათ ჰქონდეთ დაჯდომის და ისე ჭამის უფლება?” – დავით ჭიჭინაძე.