გაერთიანებული ოპოზიცია – “ძალა ერთობაშიას” ერთ-ერთი ლიდერის, “პოლიტიკური პლატფორმა – ახალი საქართველოს” თავმჯდომარის, გიორგი ვაშაძის აზრით დასავლელი პარტნიორების განცხადებას ყურადღება აუცილებლად უნდა მიექცეს. მისივე თქმით, საქართველოს დიდი პრობლემები აქვს და რთულ ვითარებაშია. ვაშაძეს მიაჩნია, რომ საერთაშორისო ორგანიზაციის მწვავე ანგარიში ქვეყნის პრესტიჟზე უარყოფითად აისახება. მისი განცხადებით, საერთაშორისო ორგანიზაციის კრიტიკული განცხადებები ეკონომიკურ განვითარებას მნიშვნელოვნად აფერხებს.
“უკვე არავისთვის საიდუმლო არ არის ის უზარმაზარი პრობლემები, რომლის წინაშეც ქვეყანა დგას. არაფორმალურ მმართველობას და სასამართლო სისტემაში დამოუკიდებლობის არარსებობას, მე კორუფციის პრობლემასაც დავამატებდი. ქვეყანაში ზედა ეშელონები კორუმპირებული გახდა იმიტომ, რომ ტენდერი აღარ ტარდება ე.წ. “ატკატების” გარეშე.
ქართულ დელეგაციას აშშ-ში ურთულესი შეხვედრა ჰქონდა, სადაც პირდაპირ დაუსახელეს პრობლემები სწორედ არაფორმალურ მმართველობაზე. ძალიან რთული მდგომარეობაა, ქართული დემოკრატია უფსკრულისკენ მიექანება, რასაც საბოლოო ჯამში მოჰყვება გაუარესებული ეკონომიკური მდგომარეობა, გაჭირვება და სიდუხჭირე, რასაც უკვე თითოეული მოქალაქე საკუთარ თავზე გრძნობს. ინვესტორებისთვის საქართველო ყალიბდება აბსოლუტურად მიუღებელ ქვეყანად. ჩავთვალოთ, რომ როდესაც ასეთი განცხადებები კეთდება, ფაქტობრივად, ინვესტიციებს ურტყამს, ფული არ შემოდის ქვეყანაში, ლარი უფასურდება, უზარმაზარი პრობლემები გვაქვს, ადამიანებს უფრო და უფრო უჭირთ. ყველა ასეთი განცხადება და შეფასება აფრთხობს იმ ხალხს, ვისაც უნდა რომ ეკონომიკაში ინვესტიცია ჩადოს, სამუშაო ადგილები შექმნას, თვითონაც მოიგოს და ქვეყანაც მოგებული დარჩეს ამ ყველაფრისგან.
როდესაც საუბარია ოლიგარქის გავლენაზე, ეს იმას ნიშნავს, რომ კანონში არსებულ წესებს აზრი არ აქვს. თუ შეუთანხმდები ოლიგარქს ან მის გარემოცვაში მყოფ ადამიანს, მაშინ გზა ხსნილი გაქვს. იგივეა სასამართლოს საკითხზეც – როცა სასამართლოს მიმართ ნულოვანია ნდობა, ვინ ჩადებს ქვეყანაში ინვესტიციას, ეს ყველაფერი აისახება ქვეყნის მძიმე ეკონომიკურ მდგომარეობაზე, რასაც ყველა ვხედავთ” – განაცხადა გიორგი ვაშაძემ.