ჩვენ, ყველანი დავიცავთ “რუსთავი 2”-ს და სიტყვის თავისუფლებას – გიორგი ვაშაძე

“პოლიტიკური პლატფორმა – ახალი საქართველოს” თავმჯდომარე ტელეკომპანია “რუსთავი 2”-ის ირგვლის განვითარებულ მოვლენებს ეხმაურება. გიორგი ვაშაძის თქმით, ხელისუფლებას არ აწყობს დამოუკიდებელი ტელევიზია. მისი თქმით, ხელისუფლებაში მოსვლის დღიდანვე ბიძინა ივანიშვილი ღიად ცდილობს მთავარი ოპოზიციური მედიის ჩახშობას.

“ხელისუფლებაში მოსვლის დღიდან ბიძინა ივანიშვილი ღიად ცდილობს მთავარი ოპოზიციური არხის ჩახშობას და დღეს უკვე ტელეკომპანიის წინააღმდეგ მორიგ იერიშს ახორციელებს. საკუთარ განცხადებებში მან ეს არაერთხელ დააფიქსირა და ყველა ღონეს ხმარობს, მიზნის მისაღწევად.

ბუნებრივია, რომ ხელისუფლებას არ აწყობს ტელევიზია, სადაც შეულამაზებლად და ობიექტურად შუქდება ქვეყანაში მიმდინარე პროცესები. ტელევიზია, სადაც ხალხს შეუძლია ღიად თქვას სათქმელი და დააფიქსიროს საკუთარი აზრი.

ბიძინა ივანიშვილის ხელისუფლებამ, არაერთხელ დაამტკიცა, რომ მან გადაუხვია პროდასავლურ კურსს. მსგავსი პროცესები აზიანებს ჩვენს იმიჯს საერთაშორისო ასპარეზზე და საფრთხეს უქმნის დემოკრატიას ჩვენს ქვეყანაში.

ეს არის შეტევა თავისუფალი სიტყვის წინააღმდეგ! ცხადია, რომ ამ პროცესის მიზანი არის ტელეკომპანიის სარედაქციო პოლიტიკის შეცვლა. ჩვენ, წინ გადამწყვეტი საპარლამენტო არჩევნები გველის, ბიძინა ივანიშვილის მთავარი მიზანია, ამ არჩევნებმა დამოუკიდებელი და მიუკერძოებელი ტელეკომპანიის გარეშე ჩაიაროს.

მიმაჩნია, რომ მთელი საზოგადოება არის სოლიდარული “რუსთავი 2”-ს მიმართ, მათ შორის პოლიტიკური პარტიები, არასამთავრობო ორგანიზაციები და ჩვენ, ყველანი დავიცავთ “რუსთავი 2″-ს და სიტყვის თავისუფლებას” – განაცხადა გიორგი ვაშაძემ.

You May Also Like

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *