ქვეყანაში შექმნილ სოციალურ ფონს, დაუცველ ბავშვებს და რუსთავში მომხდარ სასტიკ მკვლელობას, ფეისბუკის საკუთარ გვერდზე, ეხმიანება იუსტიციის საბჭოს არამოსამართლე წევრი, ანა დოლიძე:
რუსთავში ბავშვის მკვლელობის ამბავი აჩვენებს რა მძიმე სოციალური ფონი გვაქვს ქვეყანაში.
ოჯახებში გვაქვს უბედურების კერები, ლუკმა პურის საშოვნელად წასული ადამიანები, ბედის ამარა მიგდებული ბავშვები, არ არსებული სოციალური სამსახური და 0 სახელმწიფო პასუხისმგებლობა მმართველი პარტიით, რომელიც ბოლო რამდენიმე კვირა იხილავს ნემსის წვერზე რამდენი ანგელოზი ეტევა (საკუთარ სკამებზე კამათობს) რამე პრობლემაზე ფიქრის მაგივრად.
შეგახსენებთ, რომ რუსთავში 13 წლის მოზარდს, საკუთარმა ბიძამ ცივი იარაღით მრავლობითი ჭრილობა მიაყენა, რის შედეგადაც ბავშვი გარდაიცვალა.
როგორც ადგილობრივი მცხოვრებლები და გარდაცვლილის ბავშვის ახლობლები აღნიშნავენ, დაკავებულს ფსიქიკური პრობლემები ჰქონდა და იგი ამის გამო, აღნიშნულ ტრაგიკულ ფაქტამდე, მიყვანილიც კი ჰყავდათ ფსიქიატრიულ კლინიკაში, სადაც არ დაიტოვეს სამკურნალოდ.
თუმცა, ფაქტს განსხვავებულად განმარტავს ფსიქიკური ჯანმრთელობის და ნარკომანიის პრევენციის ცენტრი. მათ მიერ გავრცელებული განცხადების შესაბამისად – ექიმმა-ნარკოლოგმა შეაფასა მდგომარეობა, პაციენტი (ბავშვის მკვლელობაში ბრალდებული ბიძა, – რედ.) იმყოფებოდა გაურკვეველი ნივთიერების ზემოქმედების ქვეშ. ახლობლების თქმით, ის პერიოდულად მოიხმარდა ნარკოტიკულ ნივთიერებებს და ავლენდა არაადეკვატურ ქცევებს.
ცენტრის თანამშრომლებს პაციენტისთვის შეუთავაზებიათ სტაციონარული მკურნალობა, დიაგნოზის დაზუსტების და მკურნალობის მიზნით, რაზეც კატეგორიული უარი მიიღეს და შესაბამისად არ მოხდა მისი დაწესებულებაში დატოვება გამოკვლევის მიზნით.